الأربعاء، 29 سبتمبر 2010

الفضول





فى يوم من الأيام وأنا قاعد مع جماعة أصحابي اتعرفت عليهم من فترة قصيرة جدا ف تدريب صيفى .. واحنا قاعدين نتكلم ونهزر

ونحكى حكايات وفجأة واحد من الموجودين سأل واحد تانى : انت ليه لابس دبلة ف ايدك اليمين ؟؟ انت خاطب ولا لابسها عشان تبعد عنك البنات يا نمس ؟؟

ف الولد اللى اتوجه ليه السؤال مسك الدبلة وبصلها قوى وقال : لأ دى دبلة والدى الله يرحمه

طبعا الكل سكت بما فيهم اللى سأل السؤال واللى اتوجهله السؤال

فترة قليلة كدة اللى هى الناس مش بتبقى عارفة تقول ايه وبعدين عدى الموضوع

طبعا اللى سأل السؤال ده يا اما كان بيهزر يا اما كان عاوز يعرف فعلا هو خاطب ولا لأ

خلينا نفترض انه بيتكلم جد وانه قال كدة من باب الفضول بس

طبعا الفضول ده كلمة وحشة عند معظم الناس ومرتبطة بالتدخل فى شئون الناس

لكن هل يا ترى الفضول فعلا وحش كدة ؟؟

أنا رأيي ان الفضول ده شئ جميل بس لو استخدم ف محله

يعنى مثلا الطفل الصغير خالص لو معندوش فضول مكانش هيعرف اى حاجة

هو بيحط اى حاجة تقابله ف بقه من باب الفضول عشان يعرف طعمها

هى دى وسيلة التعلم بالنسبة ليه

بعد كدة بيكبر ويتعلم بطرق مختلفة

مثلا الطفل اللى بيكسر الحاجات بيقولوا عليه هيبقى عبقرى

لان عنده فضول شديد جدا انه يعرف ايه اللى هو مش شايفه

نيوتن مثلا وهو قاعد بيضرب كوباية شاي ليبتون سكر زيادة تحت شجرة المانجا ووقت عليه تفاحة ( أيوة شجر المانجا بيوقع تفاح ) لو مكانش عنده فضول انه يعرف ليه التفاحة وقعت كان اكتفي بأنه أكلها بعد الشاي الليبتون وخلاص

أرشميدس ايه اللى خلاه يطلع من الحمام بالفوطة ويقول وجدتها وجدتها ؟؟

أرضي الفضول جواه ففرح جدا جدا

ناس كتير قوى سر تفوقها العلمى هو فضولها

بس لازم نخلى الفضول يقف عند حدود معينه علشان ميحصلش زى اللى حصل فى الحكاية اللى حكيتها ف الأول 

وده بردو مجرد رأى ربما يكون صح وربما يكون غلط 


الثلاثاء، 21 سبتمبر 2010

زيارة مملة



يرى البعض بأن زيارة الحلاق مملة  ولكننى وعلى العكس أراها مملة لأبعد الحدود

فأنا مضطر لأن أنتظر مدة لا يعلم مداها الا الله وطوال هذه المدة على أن أستمع لحكايات الزائرين من كل الألوان

ولا أخفيكم سرا بأن الزيارة لم تعد مملة كالعادة ولكنها أصبحت ممتعة

فأنا أعرف أشياء لم أكن أعلم عنها شئ من تلك القصص التى يحكيها رواد المكان

تلك القصص أمثال ( الفرخة اللى كلت بيضها ) و ( البنت اللى اتجوزت غصب عن خالها ) و ( قصة الخناقة بين زلفى والغندور)  وغيرها من تلك القصص الممتعة التى لن يتسنى لى سماعها فى أى مكان آخر

اليوم بالتحديد سمعت قصة آلمتنى كثيرا 

كفى حديثا ولنستمع سويا لهذا الحوار الشيق مع العلم بأننى قمت بدمج بعض الجمل وحذف بعض الكلمات مثل وبعدين يا راجل والكلام ده

واحد معرفوش : مش المهندس اسمه ايه جالى امبارح فى شكوى ضدى ولازم أرخص الدور التانى وعشان أرخص الدور التانى لازم أرخص الأولانى

واحد معرفوش تانى : ده الموضوع كدة هيكلفك جامد وعملت ايه .؟؟ أقولك روح لحد من بتوع الانتخابات وهو هيشهيصلك الحوار كله والعملية هتبقى زبادى فى الفرن ( مش الخلاط ) وكله يبقى أليسطة

واحد معرفوش :يا عم ده مهندس رخم وشكله هيبوظ الموضوع الله يخرب بيت المهندسين وينتقم منهم

( هنا فقط انتفضت الغريزة الهندسية بداخلى وسمعت حواراداخليا بين الفرجار والمسطرة حرف تى يتناقشان فى كيفية رد الاهانة وودت لو أننى أخرجت الفرجار و ( غزيته ) لأنتقم لشرف الهندسة المهدر ولكن صوت العقل أنبأنى بأن الفرجار قد يكون من نصيب احدى كليتي وأعيش بقية حياتى بكلية واحدة فآثرت الصمت متعللا بأننى لازلت طالبا ولم أصبح مهندسا بعد لذلك فأنا لست تحت طائلة الاهانة )

كما أننى سأصبح شهيد الهندسة لو علم بأننى مشروع مهندس حتى ولو كان فى تخصص بعيد كل البعد عما يتحدث عنه فمثلما يخرج الزوج غضبه من رئيسه فى العمل فى زوجته وهى ليس لها ذنب

ويخرج السائقون غضبهم من المرور على الركاب ( الكراسي أربعة يا حضرات ومفيش نزول غير فى الموقف ) وهم أيضا ليس لهم ذنب

ويخرج الضباط القهر الذى اعتادوه فى الكلية على المتهمين الا من رحم الله وهدى

قد أكون أنا أيضا مثل هؤلاء الضحايا ويضيع دمى هباء ويصبح اسمى مجرد اسم معلق على لافتة فى الدورة الرمضانية المقبلة

دورة شهيد الهندسة والحلاق ... قرب قرب

واحد معرفوش تانى : طيب ما تغمزه بأى مبلغ

واحد معرفوش : ما فى واحد نصحنى بأنى أزوره ف البيت وأسيب 200 جنيه على الكرسي بس طلع بياخد ألف جنيه

اللى مضايقنى ان الألف جنيه هيروحوا على الفاضي من غير لازمة ( تدخن .. خد بس دى ) يعنى على الأرض كدة من غير ترخيص


تعاطفت معه على الرغم من أنه ينفق ماله هباء فى تدخين وغيره ولكن بالفعل شئ يدمى القلب أن يدفع مالا رشوة لمن لا قلب لهم خصوصا بأن المهندسين مستواهم المادى جيد على ما أعتقد ولكنها العادة البشرية الدائمة ( البحر يحب الزيادة )حتى ولو من حرام

استمرت مدة تعاطفى معه مدة طويلة جدا بلغت السبع ثوانى حتى بدأ فى الحديث عن مغامراته العاطفية ونزواته وبعض الخطايا التى ارتكبها غير عالم بأن الرسول صلى الله عليه وسلم قال ( كل أمتى معافى الا المجاهرين ) صدق رسول الله صلى الله عليه وسلم


ثم صرفت انتباهى عنه الى من هم بجوارى حيث بدأوا نقاشا حادا حول الكريم جل وعلاقته بالكوليسترول فى الدم

وعلاقة فرد الشعر بمرض النقرس والفرق بين حلاقة الذقن ليلا ونهارا

حقا هذه هى المناقشات والا فلا

ألم أخبركم  أننى بدأت أتمتع بهذه الزيارة المملة  ؟؟

فليغفر الله لى زلتى تلك اذن



حسبي الله ونعم الوكيل

الاثنين، 20 سبتمبر 2010

صورة وصورة






بص للصورة أوى

ركز فيها جامد

الصورة لوحدها كفاية ومش محتاجة كلام والله

بلاش الاشخاص اللى على الطرفين

ركز مع الاتنين اللى فى النص

الاتنين تشريحيا ذكور

اللى على اليمين ذكر واللى على الشمال ذكر

اللى بيعيط علشان شاف تامر حسنى ومقهور أوى ...ذكر

واللى بيبص للعدو بتاعه بكل جرأة وهو ممكن يقتله ف لحظة ...ذكر

يا ترى ايه الفرق بينهم ؟؟؟

الفرق ما بينهم زى الفرق بين السما والأرض

الفرق بينهم الرجولة

انا ببص للى على الشمال وأفرح  

وأبص للى على اليمين وأتحسر  

ببص للى على الشمال وأقول يا بختك

واللى على اليمين بقوله يا خيبتك

يا رب الطف بينا يا رب

الجمعة، 17 سبتمبر 2010

سؤال حيرنى ؟






أحيانا كنت أصاب بالدهشة  حينما أسمع أن اسرائيل منزعجة من هذا البرنامج التليفزيونى أو هذا الفيلم أو المسلسل واتهامه بأنه معاد للسامية
فاسرائيل تعرف جيدا بأنها لن تنال شيئا من وراء تلك  المهاترات والمناورات بل على العكس سوف تشجع باقى الممثلين على القيام بنفس النوعية من الأفلام بغرض كسب حب الجمهور العربي عامة وهو الذى يعنيها فى الأمر
مسلسل ( متخافوش) لنور الشريف ... فيلم ( ولاد العم) لكريم عبد العزيز ... برنامج ( ربع مشكل) الذى يعرض على قناة نايل كوميدى وغيرها من البرامج والأفلام والمسلسلات تم رفع قضايا ضدها فى المحاكم
ظللت أفكر وأفكر ترى ما الذى تستفيده هذه الدويلة من وراء هذه الدعاوى القضائية سوى تعاطف الشعوب العربية مع تلك الأعمال ؟؟

هدانى عقلى فى النهاية ( وهو مجرد رأى قد أكون على صوار أو أكون مخطئ ) أن اسرائيل بالفعل تسعى الى أن نحب هؤلاء الممثلين ويصيروا أبطالا فى عيوننا وعيون شبابنا
يصبح هذا الممثل أو تلك الممثلة أبطال نحبهم ونهواهم ثم ننسي الأبطال الحقيقيين
نرى هذا البطل أو ذاك يمثل دورا آخر فى فيلم آخر وهو البطل الذى أحببناه واتخذناه قدوة لنا يفعل كذا وكذا ثم نبدأ فى تقليده وننسي تاريخنا وماضينا وأبطالنا العظام

فى الختام هو مجرد رأى يحتمل الصواب والخطأ والله أعلم



الثلاثاء، 14 سبتمبر 2010

أنا أشك اذن أنا ... دبوس




لكم هو مؤلم أن تستيقظ مبكرا عن موعدك بمدة تصل الى الساعات الأربعة
المؤلم أكثر ألا تدرى سببا لذلك
ذات يوم أخبرنى أحد أصدقائي بأنه سوف يزورنى فى اليوم التالى صباحا
وكان هذا سببا وجيها للاستيقاظ مبكرا ومعاناة الأمرين مع عينين منتفختين وعقل
 مشوش وجسد منهك وانتظرت زيارة هذا الصديق طويلا ولكنه لم يأتى للأسف
مر الموقف مرور الكرام مع الأسف الطويل من هذا الصديق 
ينبغى ألا أكون واثقا للحد الذى يدفعنى لأن أستيقظ مبكرا
لابد من وجود بعض الشك فى الآخرين
ذات يوم وفى زيارة لمعرض الكتاب وقفت أمام كتاب اسمه ( البرمجة اللغوية
 العصبية )
أنا سمعت وقرأت عن البرمجة اللغوية العصبية ولكنها كانت مجرد مقالات منفردة
رآنى البائع أحملق فى الكتاب وأحاول تصفحه فى سرعة فقال لى " سا الفل يا عرب ..
 الكتاب ده جايب من الآخر "
أصبت بالذهول من كلماته .. هذا الكتاب يتحدث عن البرمجة اللغوية العصبية وليس
 عن فن تحضير قرش الحشيش كما أعتقد
 ولكن بالتأكيد هو يعرف جيدا ما يقول .. لن يخدعنى بالتأكيد
المهم أننى عزمت على شراء الكتاب ( اللى جايب من الآخر ) كما قال البائع
وبعدما قطعت عشرات الكيلو مترات الى منزلى قرير العين بهذا الكتاب بالتحديد
وفى اليوم التالى وعندما شرعت فى قراءة الكتاب علمت حينها يقينا بأن من قال أن
 التاريخ يكرر نفسه لم يكن يكذب
فأنا أقرأ نفس المعلومات ولكن بصيغة مختلفة بعد كل عدة صفحات
الآن بدأت أفهم .. انها مجرد مقالات مختلفة مجمعة من بعض صفحات الانترنت 
لذلك تتكرر المعلومات .. لكل مقال أسلوبه ولكن المعلومات تتكرر
ما كان على أن أثق فى البائع ولا فى الناشر الذى كتب خطبة عصماء على غلاف
 الكتاب عن أهمية أن( تبرمج لغتك عصبيا ) لتنجح فى حياتك

أذهب لشراء جهاز كمبيوتر محمول فيقسم البائع ألف يمين عن أن هذا الجهاز يباع
 بأقل سعر فى السوق عنده هو فقط.. وبأن خدمة ما بعد البيع هى الأفضل عنده بالذات
أشترى الجهاز على بركة الله ثم أكتشف بأن هذا المحل بالذات هو الأغلى
وبأنه كان من الممكن أن أشترى الجهاز بسعر أقل كثيرا ولكن من مكان آخر

أذهب الى طبيب الأسنان ليعالج أحد ضروسي فيثقب الضرس المجاور له ويقول بأنه
 السبب الرئيسي للألم وبأنه يعرف عمله جيدا وأن حواسي تخدعنى  ولسان حاله يقول
 ( فى جرح انت مش شايفه ) فأرفع راية الصمت لهذا العالم الذى يعرف جيدا ما يفعله
بعد أيام أكتشف بان ما فعله هو عين الغباء لأن الألم أصبح مضاعفا الى حد لا يطاق
وبأنه أضاف على ألم الضرس المريض ألم الضرس الجريح
لم يكن ينبغى على أن أثق بهذا الطبيب أبدا
الخطأ خطأى أن ولابد أن أتحمل قدري كرجل والا أرحل
ينبغى أن أكون وغدا متشككا فى كل ما حولى كى أحيا بسعادة بعد الآن
ينبغى أن أشك فى أصابع يدى وقدماى أيضا
لو أننى رأيت هاتفى يرن فلن أصدق .. يجب أن أشك أولا 
أنا أشك اذن أنا ... (دبوس) 
سيكون هذا مبدأى فى الحياة بعد الآن
وأنا أحب أن أكون ( دبوس)
وأنت أيضا يا من تقرأ هذا المقال لا تصدق حرفا مما قيل
ينبغى أن تكون متشككا فى كل ما تقرأ أيضا
 ينبغى أن تشك لتكون ... (دبوس) أنت أيضا
وشكرا جزيلا

سؤال ف محله





صباح الفل ع الكباتين

ايه رأيكم ف الأسئلة اللذيذة اللى  بتتوجه ليك ومش بتبقي عارف ترد عليها

خد عندك مثلا أبقى طالع من عند دكتور الاسنان وواخد بنج ومعايا روشتة واقابل واحد صاحبي ف صيدلية

يقوم يسألنى ويقولى : ايه ده هو فى ضرس ليك بيوجعك ؟؟

طيب أرد أقوله ايه ؟؟

بقوله : لا مفيش اى ضروش بتوجعنى انا بشتهبل ( طبعا علشان مش عارف افتح بقى

أبقى ف ميكروباص مثلا وأطلع الفلوس وأسأل الشخص اللى جنبي وأقوله الأجرة كام

ف يرد عليا ويقول : ايه ده انت هتدفع ؟؟

لا حضرتك انا بسأل بس عشان حد ييجى يدفعلى

آجى أنزل من الميكروباص وأقول للسواق : على جنب يا اسطى

يرد الشخص هو هو ويقولى انت هتنزل ؟؟

لا خالص ده انا بستهبل بس هنوقفه ونقوله امشي تانى

نبقى واقفين قدام المدرج وعندنا محاضرة كمان عشر دقايق

محاضرة لمدة ساعة ونص فواحد زميلى يروح اى حتة ويرجع يسأل : انت دخلتوا ؟؟

آه دخلنا انت مش شايفنا جوة اهو .. انا اللى هناك ده شايفنى

حاجة تفور الدم

صحيح عاوز اسألك سؤال يا كابتن

انت بتعرف تقرا ؟؟

الجمعة، 10 سبتمبر 2010

دموعى





تـــسـقـط كـأمـطـار الـشــتـاء دموعى

أبكى وصوت بـكـائي غـيـر مـسـموع

وتعربــد الذكـرى فـى قـلـبـي وتسألنى

ألا تــدري لـلـماضي طريق رجوع ؟؟

الخميس، 9 سبتمبر 2010

العيد




انها ليلة عيد الفطر المبارك .. أو كما نطلق عليه  فى مصر ( العيد الصغير) .. لأنه أقل فى عدد أيامه عن عيد الأضحى 

  مر رمضان سريعا هذا العام  أيضا .. لكم كنت أتمنى أن يطول ويستمر أكثر ولكنها سنة الحياة الأبدية ..... الفراق

غدا نسمع صوت التكبيرات التى تشعرك بفرحة غامرة ربما لارتباطها الشرطى معنا بيوم العيد وأيام الطفولة البريئة

 لسوف يخرج الناس من منازلهم لأداء صلاة العيد فى الساحات التى تنافس لأجلها مرشحو مجلس الشعب هذا العام 

ان الانتخابات رائعة بحق .. انها تخرج المشاعر الرقيقة والحب الدفين من قلوب المرشحين وتستحثهم على التعبير عن حبهم لنا 

تراهم جميعا يحبون الأطفال ويستمعون لكلامهم الذى يبدو لهم ساذجا بصبر جميل .. جميعهم يصلى فى المساجد ويقيم الليل 

ويخرج من أمواله اخراجا ... الكل يكتشف فجأة بأن هناك الكثير من المحتاجين وأنه أهدر الكثير من عمره هباء فى غير فعل الخير

أتمنى أن تكون الانتخابات سنوية أو نصف سنوية لكى يعم الخير بدلا من أن تكون كل خمس سنوات 

عموما لقد هرب منى القلم الى موضوع مختلف عما أردت الحديث عنه ألا وهو يوم العيد الجميل

وخصوصا عيد الفطر الذى يعتقد الكثير الا من رحم ربي بأن العبادات رفعت فى هذا اليوم أو أنها كانت حكرا على رمضان

منهم من يذهب لأداء صلاة العيد وهو لم يؤدى صلاة الصبح أصلا 

منهم من يظن أنه واجب من آداب العيد أن تطلق بصرك اطلاقا بين الفتيات اللائي يعتقدن بدورهن أن التبرج من أهم واجبات يوم العيد

الأغانى المسفة تخرج من كل مكان فرحة وبهجة بيوم العيد 

زيارات المقابر التى نهى عنها رسول الله صلى الله عليه وسلم

 ان يوم العيد ليس يوما للضلال ولكنه يوم يرفع فيه عمل الصائمين فعلينا ألا نضيع صيامنا هباءاً

وكل عام وأنتم بخير

الأربعاء، 8 سبتمبر 2010

لا تبكى يا أبي !!!




يا أبي لا تبكى ما عاد ينفعنى البكاء

فلـقد تركت دنياكم الى أخرى النقاء

لـــيت بكاء الأهل والصحب ينفعنى

لــكن لن ينفعنى اليوم سوي الدعاء

اليابان



بسم الله الرحمن الرحيم

امبارح يا جماعة قريت خبر عاوز اقولكم عليه

حالات الانتحار والاكتئاب بتكلف الاقتصاد اليابانى 31.8 مليار دولا كل سنة

تخيلوا كدة معايا

اليابانيين بينتحروا وبيكتئبوا

البلد اللى اتضربت بالقنبلة الذرية سنة 1945 ومع ذلك بقت من أقوى الكيانات الاقتصادية فى العالم ف فترة قليلة جدا

الناس فيها بينتحروا وبيكتئبوا

البلد اللى فيها القطار الطاير والتكنولوجيا المتقدمة

بتتكلف مليارات الدولارات عشان الانتحار والاكتئاب

يا ترى بينتحروا ليه ؟؟

عندهم أزمة حوض النيل زينا ؟؟ ولا حتى حنفية نيل ؟؟ 

ولا عندهم بطالة كتير زينا ؟؟

يمكن الفساد عندهم مقطع بعضه ؟؟

أو مثلا روسيا هتمنع عنهم القمح ؟؟

ممكن بردو الكهربا بتقطع عندهم والأجهزة الكهربائية بتولع ؟؟

طيب الزحمة عندهم أخبارها ايه ؟؟

واللحمة هناك بكام ؟؟

طيب يا ترى لسة عندهم مطربين بيشربوا  سيجارة بنى وبيدوروا على نفسهم ؟؟

طبعا كل الحاجات دى عندهم زى الفل وما فيش مشاكل خالص

اسباب الانتحار عندهم تعتبر رفاهية بالنسبة لينا

واحد اتطرد من شغله

اتخصم منه 1000 ين

حاجات عبيطة

لا مثلا واحد اتخرج من كلية علوم بقاله 10 سنين وبيشتغل سواق

أو محامى بيشتغل مندوب مبيعات او سباك

حاجات من اللى عندنا دى

بس أهم سبب للانتحار والاكتئاب عندهم هو عدم الايمان

أيوة الايمان بالله اللى عندنا

الايمان اللى بدأنا نتخلى عنه شوية بشوية

حبنا لبعض والجيران والعيلة

كل الحاجات الجميلة دى اللى احنا بدأنا نتخلى عنها شوية بشوية

احنا مش باقى لينا غير ايماننا ومش لازم نتخلى عنه

لازم نتمسك بيه لأبعد الحدود

التيار العلمانى اللى ابتدى ينتشر ف البلد زى السرطان لازم نوقفه

الناس اللى بتطالب بالحجاب للرجالة كمان

الناس اللى بتقول العبادة ف المسجد بس وبرة المسجد اعمل اللى تحبه

واللى بيقولوا الفن مالوش حدود ونعمل اى حاجة طالما فن وقدام الكاميرا

يا ناس فكروا بعقولكم


بس خلاص انتهى البوست

الثلاثاء، 7 سبتمبر 2010

أبمثل هذا السخف قد كنا ؟؟

السلام عليكم يا شباب

مش عارف ايه اللى فكرنى ببيت الشعر بتاع نزار قبانى اللى بيقول فيه :

أقرأ رسائلنا فتضحكنى                    أبمثل هذا السخف قد كنا


فعلا أبمثل هذا السخف قد كنا

أى واحد فينا عمل حاجات سخيفة وهو صغير ووهو كبير كمان

أكيد فى موقف معين مر عليك من يوم او من يومين وحسيت وانت بتفتكره انك كنت سخيييييييييييييييييييييييف

أكيد لما بتفتكر البنت اللى كنت بتحبها وانت فى الحضانة بتحس انك كنت تافه

اكيد لما بتفتكر خناقتك مع واحد صاحبك وانت ف ابتدائي بسبب انك تقف الاول ف الطابور ولا هو بتحس انك سخيييييييييييييف

كل الحاجات دى بتضحكنا مش كدة

بس فى حاجات بقى قليلين الناس اللى بيضحكوا عليها 

قال ايه بيقولك لو واحدة متجوزة جديد ما ينفعش تخرج من البيت قبل سبع ايام

ليه ؟؟ مين اللى بيقولى ؟؟ وهو يعرفنى منين ؟؟

مش عارف

لا والادهى انها لو خرجت يبقى لازم تربط خيط على معصمها وتعقده سبع عقد

يا راجل قول كلام غير ده

لا بجد فى ناس لسة بتفكر كدة

والخرزة الزرقا

ليه لازم تكون زرقا وليه خرزة

ويا ترى مين العالم العظيم اللى اخترع اسلوب الخرزة الزرقا اللى بتمنع الحسد

والخمسة وخميسة بردو اختراع عبقرى لازم نديله حقه

وفى حاجة كمان

لو فى حد محتار يسمى ابنه او بنته ايه

بيعمل ايه بقى

بيجيب سبع شمعات ويحط تحت كل شمعة ورقة مكتوب عليها اسم

ويولع السبع شمعات وآخر واحدة تخلص يبقى هو ده الاسم لأنه هيكون أطول عمر للطفل

يا سلام ؟؟

يعنى انا لو اسمى محمد مثلا هعيش اطول او اقصر مما لو كان اسمى أدهم مثلا

ازاى ؟؟

وغيرها من الحاجات اللى تموت من الضحك من غير ما نعرف العقيدة ورا كدة

ولا سببها الدينى

  ايه الحاجات دى ؟؟ ايه منبعها ؟؟ ليه لسة موجودة لحد دلوقتى ؟؟ 

نفسي يا ناس حد يفكر ف الحاجات دى ويفتكر

أقرأ رسائلنا فتضحكنى                      أبمثل هذا السخف قد كنا

الأحد، 5 سبتمبر 2010

مرآتنا

بحجاب بلون السماء يلتف حول وجهها المضئ كبدر التمام .. وبجوهرتين خضراوتين رائعتين تزينان وجهها الخلاب وبأهداب

 طويلة تكاد تصل الى حاجبيها الدقيقين .. وبتلك الابتسامة التى تسحر القلوب خرجت من غرفتها وقالت لى بصوتها الملائكى

الرائع :" كم أنت أنيق هذه الليلة !! " ابتسمت بدورى ورددت تحيتها بأفضل منها وقلت :" لو أننى أنيق فأنت الأناقة ذاتها ... ان القمر ليغار منك الليلة "

احمرت وجنتاها خجلا مما زاد من روعتها وضمتنى بين ذراعيها وقالت :" لا حرمنى الله منك أبدا يا أخى "

أصابنى دعاؤها بغصة فى حلقى .. فأنا مفارقها مفارقها .. ولن يمنع أحد هذا الأمر

أختى الكبري التى تكبرنى بثمانية أعوام سوف تترك منزلنا الى منزل زوجها بالتأكيد .. أختى الكبري التى أحبها أكثر من أى شخص آخر .. أختى الكبري التى تولت تربيتى بعد وفاة أمى رحمها الله ستتركنى

هناك من تقدم لخطبتها ووافق والدى عليه وهو قادم بعد دقائق الينا ولن يمر عام حتى تفارقنا

أخرجنى صوت جرس الباب من أفكارى هذه فلقد جاء زوجها المستقبلى

خرج والدى من حجرته متأنقا وطلب منى أن أفتح الباب للزائر ودلفت أختى الى حجرتها

وقفت أمام المرآه الكبيرة الموجودة فى الصالة والتى اشتراها والدى منذ مدة وجيزة لكى أعدل من هندامى .. يجب أن أكون رائعا فأنا الأخ الوحيد للعروس

فتحت الباب للعريس وحييته وأدخلته الى حجرة الجلوس ولكننى لم أسترح لهذا الشخص

هناك شئ غامض فيه لست أدرى كنهه .. ان نظرات عينيه غريبة فتبدو عيناه وكأنهما يشعان ضوءا

جلس هذا الشخص معنا مدة ليست بالطويلة ثم طلب الاذن بالرحيل مع موعد باللقاء غدا به وبعائلته كلها .. أوصلته الى باب المنزل ولكننى لاحظت شيئا فى منتهى الغرابة

لم يظهر انعكاس لجسد هذا الشخص فى المرآه

تلك المرآه الكبيرة التى اشتراها أبي مؤخرا لم تظهر صورته

ان الأشياء المادية لابد أن تظهر فى المرآه ولكن لم لم يظهر

ربما تكمن المشكلة فى المرآه وربما تكون فى الشخص وربما خانتنى حاسة بصري

على أن أكون أكثر تركيزا فى الزيارة المقبلة له

لم أنم ليلتى وصرت أفكر فى هذا الحدث الجلل وأطلب من الساعات أن تمر لكى أقطع شكى بسكين اليقين

وبعد توسل طويل استجابت الساعات لمطلبي ومرت وجاء الموعد الذى انتظرته طويلا ولكن حدث نفس الشئ الغريب

لقد ظهرت انعكاسات كل أسرته الا هذا الشخص بالذات

جن جنونى لهذا المشهد .. اذن تكمن المشكلة فى هذا الشخص مما يؤكد شعورى بعدم الراحة حين رأيته لأول وهلة

أخذت الأفكار تتلاعب بي طوال الجلسة ويبدو أننى لم أسمع من كلامهم شيئا ولم أتكلم سوي القليل

وعند المغادرة لم يظهر أيضا زكنت قد قررت مراقبة هذا الشخص لأعرف حقيقته

وبالفعل خرجت فى اثرهم واستقليت سيارة أجرة لألحق بسيارتهم ولكن هذا العريس ترجل من السيارة بعد فترة وترك الباقى يذهبون من دونه

ترجلت بدورى وذهبت لألحق به فدخل شارعا ضيقا ووقف أمام منزل متهالك مهجور وتلفت يمنة ويسرة ثم دلف الى هذا المنزل

لم أكن أتخيل أننى سأكتشف السر سريعا ويبدو أن السر يكمن فى هذا المنزل

قررت الدخول خلفه حتى ولو كان يجلس مع ملك الجان نفسه فالفضول يكاد يقتلنى

قرأت آية الكرسي والمعوذتين ثم تبعته الى الداخل فوجدته يجلس أمام امرأة عجوز بلغت من العمر أرذله ويطعمها بعض ألوان الطعام بنفسه

وحين رآنى ارتبك وسألنى كيف جئت الى هنا ؟

أخبرته أننى كنت فى الجوار ورأيته يدخل فتبعته ويبدو أنه لم يصدق ما قلته

أخذنى الى خارج المنزل وأخبرنى بأنها سيدة عجوز يقوم على خدمتها من آن لآخر ولكننى لم أبتلع هذا التفسير خصوصا مع ابتسامته الخبيثه

يبدو أن لهذا الموضوع علاقة بعدم ظهور صورته فى المرآه

تركته وعدت للمنزل والظنون تتلاعب بي وقررت اخبار أبي بهذا الأمر فأكد لى أنها مجرد هواجس وأنه رأى انعكاس الصورة فى المرآه

ولم يهدأ بالى منذ ذلك اليوم المشئوم الذى زارنا فيه غريب الأطوار هذا

فى زيارته التالية لنا استوقفه أبي أمام المرآه متحججا بأخذ رأيه فيها

ورأيت فى هذا اليوم انعكاس صورته ولكن مع ابتسامة خبيثة ليست على وجهه الحقيقى

انه يعرف أننى أشك به اذن ويحاول اغاظتى

لست أدرى ان كنت قد فقدت ساقاى أولا أم وعيي ولكننى وقعت مغشيا على ولم أستفق الى فى المستشفى

وحولى أبي وأختى وغريب الأطوار والطبيب

سمعت الطبيب يقول لوالدى :" انها حالة التخيل السلبي .. يبدو أنه يحب أخته الى حد كبير ولا يقدر على فراقها لذلك جاءته تلك الهلاوس البصرية "

آه منك يا غريب الأطوار ... أنت السبب فى رأى الطبيب هذا بالتأكيد

لن أدعك تأخذ أختى منى أبدا

حتى لو كلفنى الأمر حياتى


تمت بحمد الله


السبت، 4 سبتمبر 2010

معلومة ع الماشي



...  لو عملت حاجة مهمة  ف حياتك وحبيتها قوى قوى لدرجة المرض والجنون متقلقش

فى ناس عملتها قبلك

فى صانع تماثيل اغريقى اسمه بجماليون صنع تمثال وحبه جدا لدرجة المرض

..........................................................................


اللى كتب قصص جيمس بوند ( الواد الحليوة ده ) هو ظابط مخابرات  بريطانى اسمه ايان فلمنج
.........................................................................


الشاهنامة هو كتاب الملوك باللغة الفارسية

وده كتاب مشهور قوى كتبه أبو القاسم منصور

وبيحكى فيه ملاحم فارسية خيالية

.......................................................................


عمر الخيام ( بتاع الرباعيات المشهورة ) فارسي مش عربي

وهو عالم رياضيات كبير مش بس شاعر

وليه كتب كتير ف الرياضيات

.....................................................................


أشهر سفاح فى تاريخ أفريقيا اسمه ( موتيزا ) كان بيدفن طفل كل يوم الصبح

ويوم ما مات دفنوا 400 بنى آدم عشان الآلهة

كان متجوز 700 واحدة

وكان بيقتل مراته لو نسيت تقفل باب الأوضة وراها ( هى دى الرجالة ) ربنا ينتقم منه

...................................................................

الأسنان البيضا هى علامة علو المكانة فى قبائل أفريقيا

وزعيم القبيلة بيبقى صاحب ابيض اسنان

يا فرحتك يا سجنال تو ولا انتوا مش معايا  ؟؟؟؟

.................................................................

الدكتور بنيامين سبوك وده طبيب أطفال أمريكى بيأكد ان التخريب علامة العبقرية عند الأطفال

يا ترى أنا خربت ايه وأنا صغير ؟؟؟؟؟؟؟؟؟؟؟؟

................................................................

العالم سيريل بير  فضل طول حياته يعمل أبحاث وينشرها يأكد فيها ان نسبة ذكاء السود ( الأفارقة ) منخفضة 

وبعد ما مات المساعد بتاعه أعلن ان نتائج الأبحاث دى متلفقة 

فى أبحاث زيها بخصوص العرب على فكرة 

افرحوا بيعملوا أبحاث عننا 

..............................................................


انتهت البوست 

نلقاكم فى بوست آخر 

كان معكم الظل 

من أمام شاشة الكمبيوتر