الفضول

فى يوم من الأيام وأنا قاعد مع جماعة أصحابي اتعرفت عليهم من فترة قصيرة جدا ف تدريب صيفى .. واحنا قاعدين نتكلم ونهزر

ونحكى حكايات وفجأة واحد من الموجودين سأل واحد تانى : انت ليه لابس دبلة ف ايدك اليمين ؟؟ انت خاطب ولا لابسها عشان تبعد عنك البنات يا نمس ؟؟

ف الولد اللى اتوجه ليه السؤال مسك الدبلة وبصلها قوى وقال : لأ دى دبلة والدى الله يرحمه

طبعا الكل سكت بما فيهم اللى سأل السؤال واللى اتوجهله السؤال

فترة قليلة كدة اللى هى الناس مش بتبقى عارفة تقول ايه وبعدين عدى الموضوع

طبعا اللى سأل السؤال ده يا اما كان بيهزر يا اما كان عاوز يعرف فعلا هو خاطب ولا لأ

خلينا نفترض انه بيتكلم جد وانه قال كدة من باب الفضول بس

طبعا الفضول ده كلمة وحشة عند معظم الناس ومرتبطة بالتدخل فى شئون الناس

لكن هل يا ترى الفضول فعلا وحش كدة ؟؟

أنا رأيي ان الفضول ده شئ جميل بس لو استخدم ف محله

يعنى مثلا الطفل الصغير خالص لو معندوش فضول مكانش هيعرف اى حاجة

هو بيحط اى حاجة تقابله ف بقه من باب الفضول عشان يعرف طعمها

هى دى وسيلة التعلم بالنسبة ليه

بعد كدة بيكبر ويتعلم بطرق مختلفة

مثلا الطفل اللى بيكسر الحاجات بيقولوا عليه هيبقى عبقرى

لان عنده فضول شديد جدا انه يعرف ايه اللى هو مش شايفه

نيوتن مثلا وهو قاعد بيضرب كوباية شاي ليبتون سكر زيادة تحت شجرة المانجا ووقت عليه تفاحة ( أيوة شجر المانجا بيوقع تفاح ) لو مكانش عنده فضول انه يعرف ليه التفاحة وقعت كان اكتفي بأنه أكلها بعد الشاي الليبتون وخلاص

أرشميدس ايه اللى خلاه يطلع من الحمام بالفوطة ويقول وجدتها وجدتها ؟؟

أرضي الفضول جواه ففرح جدا جدا

ناس كتير قوى سر تفوقها العلمى هو فضولها

بس لازم نخلى الفضول يقف عند حدود معينه علشان ميحصلش زى اللى حصل فى الحكاية اللى حكيتها ف الأول 

وده بردو مجرد رأى ربما يكون صح وربما يكون غلط