صباح الفل ع الكباتين
ايه رأيكم ف الأسئلة اللذيذة اللى بتتوجه ليك ومش بتبقي عارف ترد عليها
خد عندك مثلا أبقى طالع من عند دكتور الاسنان وواخد بنج ومعايا روشتة واقابل واحد صاحبي ف صيدلية
يقوم يسألنى ويقولى : ايه ده هو فى ضرس ليك بيوجعك ؟؟
طيب أرد أقوله ايه ؟؟
بقوله : لا مفيش اى ضروش بتوجعنى انا بشتهبل ( طبعا علشان مش عارف افتح بقى
أبقى ف ميكروباص مثلا وأطلع الفلوس وأسأل الشخص اللى جنبي وأقوله الأجرة كام
ف يرد عليا ويقول : ايه ده انت هتدفع ؟؟
لا حضرتك انا بسأل بس عشان حد ييجى يدفعلى
آجى أنزل من الميكروباص وأقول للسواق : على جنب يا اسطى
يرد الشخص هو هو ويقولى انت هتنزل ؟؟
لا خالص ده انا بستهبل بس هنوقفه ونقوله امشي تانى
نبقى واقفين قدام المدرج وعندنا محاضرة كمان عشر دقايق
محاضرة لمدة ساعة ونص فواحد زميلى يروح اى حتة ويرجع يسأل : انت دخلتوا ؟؟
آه دخلنا انت مش شايفنا جوة اهو .. انا اللى هناك ده شايفنى
حاجة تفور الدم
صحيح عاوز اسألك سؤال يا كابتن
انت بتعرف تقرا ؟؟
4 التعليقات:
ههههههههه
عادي يا عم دي احسن حاجة
انا عن نفسسي باستغلها واتريق ع السؤال
زي اللي يشوفني الصبح يقول : أنت صحيت ؟
اقوله لأ لسا نايم
^_^
كل سنة وانت طيب يا جميل
وانت بالصحة والسلامة
عندك حق يا ابو حميد
بس والله انا اتريقت على سؤال قبل كدة ورجعت زعلت تانى علشان زعلت اللى سألنى
عموما دى بقت ثقافة عامة
زى تزوير الانتخابات بالظبط
يبتسألني هو أنا بعرف أقرأ ، يعني أنت بتعرف تكتب ، ولا هي مدونتك
((:
و لا تقف قدام الاسانسير و تدوس علي الزرار علشان تستدعي الأسانسير تلاقي واحد تاني جه و لا عبر و يدوس هو كمان
هو أنا شفاف و لا صغير علشان مش عارف أدوس يعني (:
و لا أنت بركة أوي و تجيب الاسانسير من ديلة
و حاجات من دي كتير
و أنا بطبعي برد علي السؤال الرخم بسؤال أرخم ... مش أنت اللي ابتديت استحمل بقي هههههههه
شكراً للمدون "أحمد فتح الباب" علي تعريفه لنا مدونتك، أنتظر مني زيارات تانية إن شاء الله
هههههههههههه
بشمهندس أحمد أنا سعيد بتشريف حضرتك ومدوناتك ما شاء الله جميلة اوى
بالنسبة للأسئلة المستفزة فده مجرد جزء بسيط والله
ومعلش بالنسبة لموضوع الاسانسير ممكن ما اخدش باله
او انت كنت ف حتة تانية وانت مش واخد بالك
إرسال تعليق
سواء اتفقنا أو اختلفنا
رأيك يهمنى ما تبخلش عليا بيه