مصر يا ولاد

صباح الخير أو  مساء الخير... حسب التوقيت المحلى اللى هتقرا فيه البوست

الواحد أحيانا كدة بيفتكر حاجات حصلت معاه زمان مش عارف بفتكرها ليه

بس المرة دى أنا عارف افتركتها ليه بس هقولكم ف الآخر

......................................................

ف يوم من الأيام وأنا صغير .. تقريبا كدة من سبع سنين كنت ف معسكر ف مدينة على البحر

معسكر تبع الادراة التعليمية لأوائل الطلبة

وف يوم من أيام المعسكر جالنا واحد ( مسئوم ) علشان يشوف أحوالنا ولو محتاجين حاجة

واحد من الطلبة قام قال : يا أستاذ الأتوبيس اللى بيودينا ويجيبنا مفيش فيه ازاز .. أتوبيس أى كلام من الآخر 

الراجل بقى المفروض هيرد عليه 

قال : طبعا لأن الأتوبيس ده احنا اخترناه كدة مخصوص علشانكم 

الجو حر دلوقتى وانتوا ممكن تعرقوا من الحر لو في ازاز ولما تنزلوا ف الهوا تاخدوا برد

وانتوا ولادنا .. انتوا المستقبل .. هيطلع منكم الدكتور والمهندس والمحامى والحرامى 

انتوا مصر ..مصر يا ولاد 

بلد عمر الشريف وعادل امام أبو دم خفيف وحسن شحاته غنى عن التعريف 

طبعا ظهرت معالم الاندهاش والازبهلال ـــ مش عارف يعنى ايه ازبهلال ـــ على وجوهنا كلنا 

ف واحد تانى قام سأله : الميه بتقطع كتير حرام كدة احنا ف الصيف 

الراجل هو هو رد وقال : طبعا لأن احنا اللى بنقطعها .. انتوا رجالة وخلاص هتدخلوا الجيش قريب 

لازم نعودكم على الصعب من دلوقتى .. انتوا هتبقوا جنود ف جيش مصر 

مصر يا ولاد ..بلد عمر الشريف وعادل امام أبو دم خفيف وحسن شحاته غنى عن التعريف 

 وازبهلينا تانى من الاجابات الجميلة بتاعته

واحد تالت سأله : الكولدير مش بيسقع الميه ده بيسخنها

الراجل اتضايق بقى المرة دى وقال : يا ابنى يا حبيبى المية الساقعة غلط على سنانكم

سنان ولاد مصر .. مصر يا ولاد .. بلد عمر الشريف وعادل امام أبو دم خفيف حسن شحاته غنى عن التعريف

وقام ومشي وسابنا واحنا مزبهلين زى ما احنا

ايه بقى اللى فكرنى بالحوار الجميل ده

الطماطم .. أيوة الطماطم

فى مسئول بيقول ان الطماطم كتير على الأكل مش حلوة ـــ بتجيب املاح ـــ  ولازم الشعب يغير من عاداته الصحية

عشان ده شعب مصر .. مصر يا ولاد ..بلد عمر الشريف وعادل امام أبو دم خفيف وحسن شحاته غنى عن التعريف

كفاية علشان المرارة