مسرحية من فصل واحد

حاجة جت ف بالى كدة فقلت اكتبها بدل ما تموت زى اللى ماتوا

مسرحية من فصل واحد

(((شر البلية ما يضحك )))

(((الشخصيات )))

وائل – هيثم – بيري – نهى – عبير

(((المكان )))

طاولة وعدد من الكراسي داخل أحد المبانى

(((الزمان ))

الثانية عشرة الا ربع مساءا

وائل : ايه رأيكم يا جماعة كل واحد يقولنا عن حاجة مهمة عملها ف حياته

بيري : واو فكرة جامدة طحن اهو نتسلى

نهى : اوكى -اى هاف نو بروبليم- بس بما انك انت صاحب الفكرة يبقى تبدأ انت

وائل : أوكى – أى ويل -

طبعا يا جماعة انتوا حاسين ان فى انحدار ف مستوى الثقافة بين المصريين

(ويقف وائل عن كرسيه وينظر الى المجهول وظلام تام على المسرح الا من ضوء مسلط على وائل وترتفع موسيقى النشيط الوطنى المصري

بلادى بلادى بلادى)

علشان كدة قررت اعمل حملة انا واصدقائي وصديقاتى على الفيس بوك اسمها " حرام عليكم اوقفوا الفواصل والاعلانات ف وسط الافلام والمسلسلات "

(عودة الاضاءة ونظرة اعجاب من بقية اصدقاء وائل تنم عن مدى اعجابهم بالفكرة )

وائل : يا جماعة الفواصل بتقلل من القيمة الفنية للعمل وده بالضرورة بيقلل من الوعى الثقافى للشعب -آند أيام شور- ان ده هو -المين ريزون فور- انحطاط الثقافة بتاعتنا

هيثم : ههههه هى دى أهم حاجة عملتها تصدق انك انسان تافه

شوفوا بقى أنا عملت ايه .... أنا عملت حملة تبرعات ضخمة قدرنا من خلالها نجمع مبلغ ضخم وقسمنا المبلغ ده قسمين

القسم الأول رفعنا بيه قضايا على أصحاب مواقع الانترنت المتخصصة فى الأغانى والفيديو كليب وطبعا انتوا عارفين ضررها على المجتمع

دى بتأثر بالسلب على مبيعات الكاسيت والسيديز

وممكن نقفلها لو اتعاونا علشان -البروديوسرز- ما يخسروش

دى حقوق ملكية فكرية- جااايز -

لازم نبقى قد المسئولية لان الشباب هم -الباك بون- لكل المجتمعات الحديثة

عبير : ( بدلال ) والقسم التانى من الفلوس عملتوا بيه ايه يا مان

هيثم : ( ابتسامة ثقة ) بنشترى بيه الشرايط بتاعت المطربين اللى اتسببت المواقع ف خسارتهم

دى- الكالتشر – بتاعتنا يا جماعة لازم نحافظ عليها

الكل : واو ... انت رائع يا هيثوم برافو عليك- جود وورك

نهى : ( بحزن وأسي ) تصدقوا انك بتهزروا ومحدش قال حاجة مهمة لحد دلوقتى اغانى ايه ومسلسلات ايه محدش اهتم بالفقرا يا جماعة .. الفقرا اللى ماليين البلد -الهومليس والاورفانز –

الناس اللى مش لاقية حاجة تاكلها

محدش فيكم حس بيهم وعمل علشانهم حاجة ايه –

الهارتس- بتاعتكم دى ...حجر

بيري : بلاش كآبة بقى- ايام سو ديبريسد –

تيل أس عملتى ايه بقى وخلصينا

نهى : احنا نظمنا وقفة احتجاجية قدام مبنى وزارة التجارة والصناعة علشان اسعار المواد الاساسية زادت بشكل ملحوظ

مش علشاننا بس علشان الناس الغلابة

تصوروا أسعار الميك أب زادت بنسبة كبيرة أوى وكمان جودتها قلت ... طيب والناس الغلابة بقى تعمل ايه ... مش حرام ؟؟

عبير : طيب مش نقوم بقى ولا ايه الفيلم خلاص هيبتدى وانا –سو اكسايتد- انى اتفرج عليه

بلاش بقى تعيشوا دور المصلحين الاجتماعيين واحد عامل فيها سعد زغلول والتانى عامللى فيها نصير المطربين الغلابة والتالتة فاكرة نفسها صافى _ الوايف بتاعت سعد زغلول –

الكل : اوكى - يللا- ده فيلم قشطات اوى